ಬಡವರಾದರೇನು ಪ್ರಿಯೆ.....?

ನಾವು ಬಡವರಾದರೇನು ಪ್ರಿಯೆ
ನಮ್ಮ ಪ್ರೀತಿಗೇನು ಬರವೇ?
ಅರಿತು ಬೆರೆತು ಬಾಳಲು
ಒಲವೆ ನಮಗೆ ಒಡವೆ..

ನಿನ್ನ ಪ್ರೀತಿ
ಮೊಗೆದುಮೊಗೆದು ಕೊಟ್ಟರೂ
ಬತ್ತದಾ ಸೆಲೆ..
ನನಗೆ ನೀನು,ನಿನಗೆ ನಾನು
ಹರಿಸು ನಿತ್ಯ ಮುತ್ತಿನಾ ಮಳೆ

ನನ್ನೆದೆ ಅರಮನೆಯೊಳಗೀಗ
ನೀನೇ ನನ್ನಯ ಅರಸಿ..
ಕಣ್ಣಿನಲ್ಲಿ ಕಣ್ಣನಿಟ್ಟು ನಿನ್ನ ಕಾಯುವೆ
ಎಲ್ಲ ನೋವ ಮರೆಸಿ

ಬದುಕ ಕಟ್ಟಲೊಂದು ಬಯಕೆ
ನನಗೆ ನೀನೇ ಸ್ಫೂರ್ತಿ..
ಮರೆಯಲಾರೆ ನಿನ್ನ ನೆನಪ
ಉಸಿರು ಮುಗಿವವರೆಗೆ ಪೂರ್ತಿ