ಹೀಗೆ ಇನ್ನೊಂದಿಷ್ಟು ಸಾಲುಗಳು......

ಕತ್ತಲಾದ
ಬದುಕ ದಾರಿಯಲ್ಲಿ
ಸಿಗದ ಪ್ರೀತಿಗೆ
ತಡಕಾಡಿ ಸೋತು
ಕೈ ಹೊತ್ತು ಕೂತಾಗ
ಬೆಳಕಾಗಿ ಬಂದಳು..
ಈಗ
ಹುಣ್ಣಿಮೆಯಿರಲಿ
ಅಮಾವಾಸ್ಯೆಯಿರಲಿ
ಬದುಕಲ್ಲಿ ಪೂರ್ತಿ
ಬೆಳದಿಂಗಳು..!
**********
ಗೆಳತಿ;
ಬದುಕಲಿ ಪ್ರೀತಿಯೆಂದರೆ
ಮುತ್ತು ಪೊಣಿಸಿದ ಹಾರ
ನೀ ಮುತ್ತಾದರೆ
ನಾ ದಾರ..
ಒಬ್ಬರಿಗೊಬ್ಬರು ಆಧಾರ
ಒಂದಕ್ಕೊಂದರ
ಬೆಸುಗೆ ಇಲ್ಲಿ...
ತಪ್ಪಿ ಹೋದರೆ
ಬದುಕು ಚೆಲ್ಲಾಪಿಲ್ಲಿ..!
**********

ಕತ್ತಲಾವರಿಸಿದ ದಾರಿಯಲ್ಲಿ
ಧುತ್ತನೆದುರಾದ ಪ್ರಶ್ನೆಗಳಿಗೆ
ಉತ್ತರ ಹುಡುಕುತ್ತಾ ಹೊರಟಾಗ
ಹೊತ್ತು ಮುಗಿದಿತ್ತು..
ಸತ್ತ ಕನಸುಗಳ
ಹೊತ್ತು ಮಲಗಿದ ನನ್ನ
ಅದು ಯಾರೋ ಹೊತ್ತಾಗಿತ್ತು.!!
**********

ನಿನ್ನ ಕಂಗಳಲ್ಲಿನ
ಬಿಟ್ಟಿರಲಾಗದ ಆಕರ್ಷಣೆ
ಸೂಜಿಗಲ್ಲಿನಂತೆ
ಸೆಳೆಯುತ್ತಿದೆ ಕಣೇ...
ನೀನೆಷ್ಟೇ ಹೋದರೂ ದೂರ
ಮತ್ತೆ ಮತ್ತೆ ನೆನಪಾಗಲು
ಕಾರಣವೂ ಇದೇ ತಾನೇ...?!
**********

ಹೀಗೇ ಕೆಲವು ಸಾಲುಗಳು.......

ನಿನ್ನ ಬರುವಿಕೆಗಾಗಿ ಕಾದು
ಅರ್ಧ ಬದುಕು ಕಳೆದಿದ್ದೆ
ನೀ ಸಿಕ್ಕ ಮೇಲೆ
ನಿನ್ನಲ್ಲಿ ನಾ ಪೂರ್ತಿ
ಕಳೆದು ಹೋಗಿದ್ದೆ
*********

ಮನದೊಳಗೆ
ಅವಿತು ಕುಳಿತಿತ್ತು
ಹೇಳಲು ಉಳಿದ ಮಾತು
ಸ್ವಲ್ಪ ಜಗಳ, ಸ್ವಲ್ಪ ಹರಟೆ
ಶುರುವಾಗುವ ಮೊದಲೇ
ನೀ ಅರ್ಧದಲ್ಲೇಕೆ ಎದ್ದು ಹೊರಟೆ??
*********

ನಾ ತಿಳಿದಿದ್ದೆ ಗೆಳತಿ
ಉಸಿರಿಗೆ
ಗಾಳಿಯಿದ್ದರಷ್ಟೇ ಸಾಕು
ನೀ ಬಿಟ್ಟು ಹೋದ ಮೇಲೆ
ತಿಳಿಯಿತು ಅದಕ್ಕೆ
ಜೀವ ತುಂಬುವವರು ಬೇಕು..!
*********

ನಿನ್ನ ನಗುವಿಗೂ
ಇಷ್ಟೊಂದು ಶಕ್ತಿಯಿದೆ
ಕಣ್ಣೋಟ
ಇಷ್ಟೊಂದು ಹರಿತವಿದೆ
ಎಂದು ಅರಿವಾದದ್ದು
ಅದಕ್ಕೆ ನಾ ಗುರಿಯಾದ ಮೇಲೆ !!
**********

ಮುಂದುವರಿದವರು......

ಸತ್ಯ ಸಹನೆ ಶಾಂತಿ ಮಂತ್ರಗಳೇ  ನಮ್ಮ ಅಸ್ತ್ರ ಎನ್ನುತ್ತೇವೆ
ಕೆಟ್ಟ ಹಸಿವೆಗೆ,ನಮ್ಮ ಸ್ವಾರ್ಥಕೆ ನಮ್ಮವರನ್ನೇ ಕಿತ್ತು ತಿನ್ನುತ್ತೇವೆ

ದೇಶ ಪ್ರೇಮ,ಭಾಷಾಭಿಮಾನ,ಜಾತ್ಯಾತೀತತೆಯ ನುಡಿಯುತ್ತೇವೆ
ಕೊನೆಯಿರದ ದಾಹಕ್ಕೆ ಕೊನೆಗೆ ಹಸಿರಕ್ತವನ್ನಾದರೂ ಕುಡಿಯುತ್ತೇವೆ

ಅಸಾಧ್ಯ,ಅಗೋಚರ ಭವಿಷ್ಯಗಳ'ದಿವ್ಯ'ದೃಷ್ಟಿಯಲ್ಲಿ ಕಾಣುತ್ತೇವೆ
ಕಣ್ಣೆದುರಿನ ಕೊಲೆ,ಅತ್ಯಾಚಾರ ಹಿಂಸೆಗಳಿಗೆ ಕುರುಡರಾಗುತ್ತೇವೆ

ನೆಟ್,ಮೊಬೈಲ್,ಚಾಟ್ ನಲ್ಲಿ ಅಪರಿಚಿತರಲ್ಲೂ ಮಾತನಾಡುತ್ತೇವೆ
ಮನೆಯ ಮೂಲೆಯಲ್ಲಿನ ಹಿರಿಯರೆಂದರೆ ಮೂಕರಾಗುತ್ತೇವೆ

ಊರಿನ ಆಗುಹೋಗು,ಕ್ರಿಕೆಟ್ ಸ್ಕೋರ್ ತಡವಿಲ್ಲದೆ ಕೇಳುತ್ತೇವೆ
ದೀನರ ಅಳಲು,ಆಕ್ರಂದನ ನೋವುಗಳಿಗೆ ಕಿವುಡರಾಗುತ್ತೇವೆ

ಮುಗಿಲೆತ್ತರಕೆ ಹಾರುತ್ತೇವೆ,ಚಂದ್ರಮಂಗಳಗಳ ಮುಟ್ಟುತ್ತೇವೆ
ಜಾತಿ ಧರ್ಮ,ಮಠಮಂದಿರಗಳ ಹೆಸರಿನಲ್ಲಿಗೋರಿ ಕಟ್ಟುತ್ತೇವೆ

ಬಡವರ ಅನಾಥರ ಬೆವರಿನಲ್ಲಿ ಸೌಧ ಬಂಗಲೆಗಳ ಕಟ್ಟುತ್ತೇವೆ
ನೆಮ್ಮದಿ ಸುಖ ಸಂತೋಷ ಸಂಬಂಧಗಳ ದೂರ ಅಟ್ಟುತ್ತೇವೆ

ಸ್ವರ್ಗವೆಂಬುದ ಇಲ್ಲಿಯೇ ಬಿಟ್ಟು ನರಕದ ಬಾಗಿಲು ತಟ್ಟುತ್ತೇವೆ
ಎಷ್ಟೊಂದು ಮುಂದುವರಿದಿದ್ದೇವೆ ನಾವು..?!

'ನಿನ್ನ' ಬಗ್ಗೆ ಅನಿಸಿದ್ದು.....

ನೀ ನನ್ನ ಬದುಕಿನಲ್ಲಿ

ಕಳೆದು ಹೋದಾಗಿನಿಂದ

ಅಲ್ಲಿ ಬರಿಯ ಏಕಾಂತ

ನಿಶ್ಯಬ್ಧ.... ನೀರವ...

ಗೆಳತೀ ನೀನೆಂದಿಗೂ

ನನ್ನವಳೆಂದೂ ಗೊತ್ತಿದ್ದು

ನೀ ಬಯಸಿರುವ

ಕನಸಿನ ಹುಡುಗ ಯಾರವ?!

**********

ನೀ ನಿನ್ನೊಳಗೆ ಮುಚ್ಚಿಟ್ಟ

ಬಿಚ್ಚಿಡಲಾಗದೆ ಎದೆಯೊಳಗೆ

ಬಚ್ಚಿಟ್ಟ

ಬೆಚ್ಚಗಿನ ಹೊಚ್ಚ ಹೊಸ ಭಾವಗಳು

ಆ ಕಣ್ಣಂಚಲ್ಲಿ ಕಿಚ್ಚು ಹಚ್ಚಿ

ಹುಚ್ಚೆಬ್ಬಿಸಿ

ನನ್ನೆದೆಯಲ್ಲಿ ಹಚ್ಚ ಹಸುರಾಗಿ

ಅಚ್ಚೊತ್ತಿದ ಮೇಲೆ 

ನಾ ನಿನ್ನ ಮೆಚ್ಚಿದ್ದು ಹೆಚ್ಚೇ..??

***********

ಸುಟ್ಟು ಹೋದ ಹೃದಯದಲ್ಲಿ

ಈಗ ಬೆಳಕೆಲ್ಲಿ?

ನೀ ನಿಟ್ಟು ಹೋದ ಮೇಲೆ

ಕೊಳ್ಳಿ..!

ಬರಡು ಭೂಮಿಯಲ್ಲಿ

ಹೇಗೆ ಹೂ ಬಿಟ್ಟೀತು ಗೆಳತಿ

ನೀ ನೆಟ್ಟ ಬಳ್ಳಿ ?

************

ಜೀವನವೆಂದರೆ

ನೆನಪುಗಳ ಜೊತೆಗೆ

ಕನಸುಗಳು ಬೇಕಂತೆ

ಗೆಳತೀ..ನೀ

ನನ್ನವಳಾಗದಿದ್ದರೇನಂತೆ?

ಜೊತೆಯಿರಲು ಸದಾ

ಕಾಡುವ ನೆನಪುಗಳ ಕಂತೆ

ನಿನ್ನ ಮರೆಯಲಾಗದ

ಬದುಕೀಗ ನಿತ್ಯ

ಕನಸುಗಳ ಸಂತೆ..

***********

ನನ್ನೆದೆಯಂಗಳದಲ್ಲಿ ನೀ

ಹಕ್ಕಿಯಂತೆ ನಲಿದಾಡುತ್ತಿದ್ದು

ಹಾರಿ ಹೋದ ಮೇಲೆ ದೂರ

ಅಲ್ಲಿ ಉಳಿದದ್ದು

ನೀನಿಟ್ಟ ಹೆಜ್ಜೆಗಳು ಮೂಡಿಸಿದ

ಆ ಗೆಜ್ಜೆ ಸದ್ದು

************

ಮೊದಲ ಮಳೆ ಹನಿಗೆ

ಕಾದ ಭುವಿಯಂತೆ

ಈ ಪ್ರೀತಿ ಎಂಬುದನ್ನು

ಗೆಳತಿ ನೀನ್ಯಾಕೆ ಅರಿಯೆ?

ಹೃದಯದಲ್ಲಿ ನೂರಾಸೆ ಕನಸುಗಳ

ಕಿಡಿ ಹೊತ್ತಿಸಿದ ನೀನು

ಬೆಳಕಾಗುವ ಮೊದಲೇ

ನೀರೆರಚಿದ್ದು ಸರಿಯೇ..?!

************

ಮೂರು ಹನಿಗಳು......

ವೇದ ಸುಳ್ಳಾದರೂ
ಗಾದೆ ಸುಳ್ಳಾಗದು
ಹೇಗೆ ಅಂದಿರಾ.?!
ಉದಾಹರಣೆಗೆ,
ಅತ್ತೆಗೊಂದು ಕಾಲ
ಸೊಸೆಗೊಂದು ಕಾಲ
ಇಂದು ಸೋನಿಯಾ
ಅಂದು ಇಂದಿರಾ..!

.........

ರಾಜಕಾರಣಿಗಳಿಗೆ ಅಭ್ಯಾಸ
ಕೇಳಿದ್ದು ಸಿಗದಿದ್ದರೆ ಪಕ್ಷಾಂತರ
ಜೊತೆಗೆ ರಾಜಿನಾಮೆ ಸ್ಥಾನಕ್ಕೆ
ಈಗ ಸ್ವಲ್ಪ ವ್ಯತ್ಯಾಸ..
ಅಲ್ಲಿಂದಿಲ್ಲಿ ಸ್ಥಳಾಂತರ
ದಿಲ್ಲಿಯಿಂದ ಕೃಷ್ಣ ಜನ್ಮಸ್ಥಾನಕ್ಕೆ !

.........

ಪೇಪರಿನಲ್ಲಿ ಸುದ್ದಿ..
ಟೂತ್ ಪೇಸ್ಟಿನಲ್ಲಿ ಕೂಡಾ ನಿಕೋಟಿನ್ನು
ಹಾಗಾಗಿ..,
ಧೂಮಪಾನ ಮಾಡಬೇಕಿಲ್ಲ ಇನ್ನು!
ಬಿಟ್ಟುಬಿಡಿ ಹಾಳು ಸಿಗರೇಟ್
ನಿತ್ಯ ಉಪಯೋಗಿಸಿ ಕೋಲ್ಗೇಟ್

........