ಒಂಟಿ ಪಯಣ...

ಈ ಕಲ್ಲು ಮುಳ್ಳಿನ ದಾರಿಯಲ್ಲಿ
ಎಡವಿ ಕೊಡವಿ ನಡೆವ ವೇಳೆ
ಕೈ ಹಿಡಿವವರಿಲ್ಲದೆ ನಡೆದ
ದೂರವದು ಎಷ್ಟೋ...

ಬಗೆ ಬಗೆ ಕನಸಿನ ಗುಂಗಲಿ
ಮೈಮರೆತಾಗ ಸುಮ್ಮನೆ ಕಳೆದ
ಕ್ಷಣಗಳು ಕಾಡಿದ ನೆನಪದು ಒಂದಿಷ್ಟು..

ದಾರಿಯ ತುಂಬಾ ಕಣ್ಣಿಗೆ ಕಂಡ
ಬಣ್ಣದ ಹೂಗಳು ನೂರಾರು..
ಪಾಲಿಗೆ ಬರದೆ ಯಾರದೋ
ಮುಡಿಯೇರಿದ ಮೇಲೆ ನನ್ನೆದೆ
ಒಡೆದ ಕನ್ನಡಿ ಚೂರು..

ರಣಬಿಸಿಲಿನ ಬೇಗೆಗೆ ಬಾಯಾರಿದೆ
ಗಂಟಿಕ್ಕಿದೆ ದಾಹದಿ ಕೊರಳು
ಹುಡುಕಾಡಿದೆ ಜೀವ ತಣ್ಣನೆ ನೆರಳು

ದೂರದ ಗುರಿ ಸೇರುವ ತವಕದಿ
ಸಂಜೆಯಾಗುತಿದೆ ಈಗ..
ಒಂಟಿಯಾನವು ನನ್ನದು
ಜೊತೆಯಿರದ ಬದುಕ ತುಂಬಿದೆ
ಬರಿಯ ಮೌನ ರಾಗ ...

ಕೆಲವು ಹನಿಗಳು..

ಗೆಳತಿ ನೀನೆಂದರೆ ಯಾಕೋ
ಮೂಡಿದೆ ಕನಸು,ಕೂಡಿದೆ ಮನಸು
ಬೇರೆ ನಾ ಹೇಳುವುದೇನು..?
ಅರೆಕ್ಷಣ ಕೂಡಾ ನೀ ನೊಂದರೆ ಸಾಕು
ಕರಗುವ ಹೃದಯ,ಮರುಗುವ ಜೀವ
ಆ ನೋವಲ್ಲಿಯೇ ಬದುಕುವೆ ನಾನು !

...................

ಮಳೆಹನಿಯೊಂದು ಉರುಳಿ
ಕಡಲಾಳ ಸೇರಿ
ಆಗುವುದು ಸ್ವಾತಿಮುತ್ತು
ಕಣ್ಣೋಟವೊಂದು ಹೊಳೆದು
ಹೃದಯಗಳೆರಡು ಸೇರಿ
ಪ್ರೀತಿಯಾಗಿ ಬೆಳೆವ ಪರಿ
ಯಾರಿಗೇನು ಗೊತ್ತು..!

..................

ಅಗಣಿತ ತಾರೆಗಳಿದ್ದರೂ ಕೂಡಾ
ಬಾನಿಗೆ ಆ ಚಂದಿರನೊಬ್ಬನೇ ಸಾಕು
ಸಾವಿರ ಹುಡುಗಿಯರಿದ್ದರೂ ಎದುರಲಿ
ನನ್ನೀ ಬದುಕಿಗೆ ನೀನೊಬ್ಬಳೇ ಬೇಕು

...................

ನೀನಂದು ಸಿಕ್ಕಿದ್ದು,ಆಗ ನಕ್ಕಿದ್ದು
ಆಮೇಲೆ ಪ್ರೀತಿ ಉಕ್ಕಿದ್ದು
ಕೇವಲ ನಪ ಮಾತ್ರ..
ಹಾಗೆಯೇ ಕೊನೆಗೆ ದಕ್ಕಿದ್ದು
ನಿನ್ನ ನೆನಪು ಮಾತ್ರ..!

ಮೂರು ಹನಿ(ಣತೆ)ಗಳು....

ಗೆಳತೀ ನೀ
ಹಚ್ಚಿಟ್ಟು ಹೋದೆಯಲ್ಲಾ
ಪ್ರೀತಿ ಹಣತೆ ಹೃದಯದಲ್ಲಿ
ನನಗೀಗ
ನಿತ್ಯ ದೀಪಾವಳಿ..!

...............

ಹುಡುಗೀ...
ಈ ಉರಿವ ಹಣತೆ
ಈ ಸಾಲು ದೀಪ
ಎಲ್ಲ ನಮಗೆ ಯಾಕೆ ಬೇಕು?
ನಿತ್ಯ ಹೀಗೇ..
ಇದ್ದರೆ ಸಾಕು
ಮನೆ ಬೆಳಗಲು
ನಿನ್ನ ಕಣ್ಣ ಬೆಳಕು..

.............

ಒಂದಷ್ಟು ದೀಪ ಹಚ್ಚಲು
ಮೂಡಿತು ಬೆಳಕು
ಮನೆಯ ಸುತ್ತಲೂ
ಆಗೊಮ್ಮೆ ಕಣ್ಣು ಮುಚ್ಚಲು
ಎಲ್ಲೆಲ್ಲೂ ಕತ್ತಲು !
ಅರಿವಾಯಿತು ಸತ್ಯ
ಮನೆಯಲಿದ್ದರಷ್ಟೆ ಸಾಲದು ಬೆಳಕು
ನಮ್ಮ ಮನದಲ್ಲಿರಬೇಕು

ನೀನಿಲ್ಲದೆ........

ನಿನ್ನಿರವಿನ ಬಲವಿರದಿರೆ
ಈ ಬದುಕಿಗೆ ಏನಿದೆ ಅರ್ಥ?
ಕರುಣೆಯ ಕರ ಚಾಚುತ ಮನ
ಬೆಳಗಿಸು ಸುಖ ಸಂತಸ ತರುತ

ಈ ನೀರು ಮಳೆ ಗಾಳಿ,ಹಸಿರು
ರವಿ ಚಂದ್ರ ಹೆಳೆಯುವ ತಾರೆ
ಎಲ್ಲವು ನಿನ್ನಿರವಿನ ಛಾಯೆ
ಎದೆಗೂಡಲಿ ಬೆಳಕರಳಿಸು
ಈ ಬದುಕನು ಕೈಚಾಚುತ ತಾಯೆ

ಇಳಿದು ಬಾ ಇಳೆಗೆ,ಒಲವ ತಾ ನಮಗೆ
ಹಸಿರಾಗಿಸು ಜಗವ ಸುರಿಮಳೆಯಾಗಿ
ಉಸಿರಾಡಲಿ ಹಳೆಬೇರಲಿ..
ಜೊತೆಯಾಗುತ ಹೊಸ ಚಿಗುರಿಗೆ ನೆರಳಾಗಿ..

ಈ ಜೀವನ ಹೋರಾಟವು ಕ್ಷಣ ಕ್ಷಣಕೂ
ಆಧರಿಸುತೆಮ್ಮನು ಶಕ್ತಿಯ ತುಂಬಿಸು
ಹರಿಯುವ ನೆತ್ತರ ಕಣಕಣಕೂ
ನಿನ್ನಿಂದಲೇ ಬೆಳಕಾಗಲಿ ತಾಯೇ
ನಮ್ಮ ಈ ಕಪ್ಪಡರಿದ ಬದುಕು.

ಬಡವರಾದರೇನು ಪ್ರಿಯೆ.....?

ನಾವು ಬಡವರಾದರೇನು ಪ್ರಿಯೆ
ನಮ್ಮ ಪ್ರೀತಿಗೇನು ಬರವೇ?
ಅರಿತು ಬೆರೆತು ಬಾಳಲು
ಒಲವೆ ನಮಗೆ ಒಡವೆ..

ನಿನ್ನ ಪ್ರೀತಿ
ಮೊಗೆದುಮೊಗೆದು ಕೊಟ್ಟರೂ
ಬತ್ತದಾ ಸೆಲೆ..
ನನಗೆ ನೀನು,ನಿನಗೆ ನಾನು
ಹರಿಸು ನಿತ್ಯ ಮುತ್ತಿನಾ ಮಳೆ

ನನ್ನೆದೆ ಅರಮನೆಯೊಳಗೀಗ
ನೀನೇ ನನ್ನಯ ಅರಸಿ..
ಕಣ್ಣಿನಲ್ಲಿ ಕಣ್ಣನಿಟ್ಟು ನಿನ್ನ ಕಾಯುವೆ
ಎಲ್ಲ ನೋವ ಮರೆಸಿ

ಬದುಕ ಕಟ್ಟಲೊಂದು ಬಯಕೆ
ನನಗೆ ನೀನೇ ಸ್ಫೂರ್ತಿ..
ಮರೆಯಲಾರೆ ನಿನ್ನ ನೆನಪ
ಉಸಿರು ಮುಗಿವವರೆಗೆ ಪೂರ್ತಿ

ನಾಲ್ಕು ಹನಿಗಳು..

ಅಂದು ಆಕೆ
ನನ್ನೆದೆಯ
ಬೆಳಕಾಗಿ ಇದ್ದಳು
ಆದರೆ..
ಹೃದಯ ಇಂದು
ಸುಟ್ಟು ಉರಿದು
ಕರಕಲಾದ ಇದ್ದಲು !

......

ಮಿಂಚು....
ಸುರಿವ ಮಳೆಗೆ
ತೋಯ್ದ ಇಳೆಯ
ಮೈಯ ಸೊಬಗ
ಕಂಡು ವರುಣ
ಹರಿಸಿದ ಕಣ್ಣೋಟ.

......

ನನ್ನ ಹೃದಯವೀಗ
ಎಣ್ಣೆಯಿಲ್ಲದ ಬತ್ತಿ
ಗೆಳತೀ..
ನಿನ್ನಬಗೆಗಿನ
ನನ್ನಭಾವನೆಗಳು
ಹೋದ ಮೇಲೆ ಬತ್ತಿ !!

.......

ಮದುವೆಗೆ ಮೊದಲು
ಹೆಣ್ಣು,ಕಾಯಿ
ಮದುವೆಯಾದ ಬಳಿಕ
ಹಣ್ಣು, ತಾಯಿ !!

ಅಂದು ಅವಳು
ಬಂದು ನನ್ನ
ಹೃದಯ ಕೋಟೆಯನ್ನೇ
ಗೆದ್ದಳು
ಇಂದು ಅಲ್ಲಿ
ಎಲ್ಲ ಪಾಳು ಬಿದ್ದು
ಅದರ ತುಂಬಾ
ಗೆದ್ದಲು !